عمران خان کی پمزمنتقلی ، طبی معائنہ، ڈاکٹرز کی رپورٹ ، تمام حقائق سامنے آگئے

اسلام آباد ( کوہسار نیوز) اڈیالہ جیل میں قید بانی پی ٹی آئی اور سابق وزیر اعظم عمران خان کی صحت اور اسپتال منتقلی کے حوالے سے گزشتہ چند روز سے جاری تمام افواہیں اور سنسنی خیز ڈراما فائنل میڈیکل رپورٹ آنے کے بعد ختم ہو گیا ہے۔ اسلام آباد انتظامیہ اور پمز (PIMS) اسپتال کے ذرائع نے عمران خان کے طبی معائنے اور دوبارہ جیل منتقلی کے تمام واقعات کی تفصیلات جاری کر دی ہیں۔تفصیلات کے مطابق، جیل حکام کی درخواست پر گزشتہ روز عمران خان کو سخت سیکیورٹی میں اڈیالہ جیل سے اسلام آباد کے پمز اسپتال منتقل کیا گیا تھا، جہاں ڈاکٹروں کے ایک خصوصی میڈیکل بورڈ نے ان کا تفصیلی طبی معائنہ کیا۔ اس سے قبل ان کے کچھ ٹیسٹ شفا انٹرنیشنل اسپتال میں بھی کروائے گئے تھے۔ میڈیکل بورڈ میں شامل ماہرین امراضِ قلب، معالجین اور دیگر سینئر ڈاکٹرز نے سابق وزیر اعظم کے خون کے نمونے، بلڈ پریشر، دل کی دھڑکن اور دیگر ضروری ٹیسٹ کیے۔پمز اسپتال کے میڈیکل بورڈ کی فائنل رپورٹ کے مطابق، عمران خان کے تمام طبی ٹیسٹ بالکل نارمل آئے ہیں اور ڈاکٹرز نے انہیں مکمل طور پر صحت مند اور فٹ قرار دیا ہے۔ رپورٹ میں بتایا گیا ہے کہ انہیں صحت کا کوئی بڑا یا تشویشناک مسئلہ درپیش نہیں ہے۔ طبی معائنے کے فوراً بعد سیکیورٹی خدشات کے پیش نظر عمران خان کو پمز اسپتال سے واپس اڈیالہ جیل منتقل کر دیا گیا ہے۔ دوسری جانب پی ٹی آئی قیادت اور وکلا کا کہنا ہے کہ وہ عمران خان کی صحت کے حوالے سے مسلسل رابطے میں ہیں اور جیل میں ان کی سیکیورٹی اور طبی سہولیات پر کوئی سمجھوتہ نہیں کیا جائے گا۔